Raat ka samay tha, chandni apne poore shabav par thi, aur mahal ke har kone mein ek ajeeb si shanti chhayi hui thi. Aarohi apne kamre mein mast neend mein so rahi thi. Uska chehra chand ki roshni mein chamak raha tha, jaise koi pari neend ke jhule mein ho. Uske halkay se muskurate hoth aur masoomiyat se bhara chehra dekhkar lagta tha ki woh kisi sapne mein khoi hui ho, jahan sirf khushi aur sukoon ho. Uski saari, jo gulabi aur safed rang mein thi, uske chehre ki roshni ko aur zyada ubhaar rahi thi.

Dusri taraf, Rajkumar Yash apne ghode par safar karte hue laut raha tha. Uska dil Aarohi ke khayalon mein uljha hua tha. Har baar jab usne Aarohi ko dekha tha, uska masoom chehra aur masti bhara vyavhaar uske dil ko ek ajeeb si garmi se bhar deta tha. "Woh kitni khoobsurat lag rahi thi... jaise ek jheel ke beech khilta hua kamal," Yash ne apne mann mein socha.